"Алхрақәа мҩаԥысит еиҿагыларак, вбақәак ҟамҵакәа, актқәа зегьы шьақәыргылоуп, акандидатцәа рахьтә агәаҭаҩцәа зегьы рнапынҵақәа ыҟоуп. Алхыҩцәа рзеиԥш хыԥхьаӡараҟнытә 66% иреиҳаны рыбжьы рҭиит. Зынӡа иҭаҩын 195-ҩык ауааԥсыра, зхыԥхьаӡара ацлаз ирылаҵаны иҟалеит 205-ҩык", – иҳәеит Гәылариа.

Алхратә округ №3 аҟны зынӡа рыбжьы рҭиит 123-ҩык ауааԥсыра. Урҭ рахьтә 76-ҩык ауаа рыбжьы рҭиит Инал Аршба изы, 31-ҩык – Сурам Џьынџьал изы, Ахра Кәакәасқьыр фы-бжьык иоуит насгьы ҩ-бжьык иоуит Роберт Гацерелиа.

Гәылариа иацҵаны иазгәеиҭеит арегламент инақәыршәаны ахыркәшаратә лҵшәақәа ажәлар ирылаҳәазар ахәҭоуп хәы-мыш ирҭагӡаны. Инықәырԥшшәа уи рылаҳәахоит ашәахьа абҵарамза 20 рзы.

Абжьыҭира амҩаԥгара адепутат Алик Бигәаа иԥсҭазаара алҵра иадҳәалахеит. Даҽазныктәи алхрақәа рымҩаԥгаразы аӡбамҭа аднакылеит АКХ (ЦИК) еицҿакны жьҭаарамза 19 рзы.